******

今個星期好攰.....冇瞓過覺.... 因為

1. 食得飽o個頭，頂住個胃
2. 隔離房好似晚晚打架, 好嘈
3. 幫劉華表弟譯野，搞左成晚
4. 厠所個沖厠唔知點解壞左, 成晚係咁流水，好嘈
5. 洗衣機壞左，晚晚用手洗衫，攰o個頭又訓唔著
6. Peter一家人過左黎，晚晚傾偈傾到三更半夜，冇可能瞓

買咁大張床都冇用啦，都訓唔著!
我一訓唔著就好容易忟憎架啦!頂，幾時先訓得著呀!
*********************************************

米高去左香港玩，前晚我打電話比佢，佢話佢係灣仔茶餐廳食緊鮮茄牛肉飯，又去左Sham Sek Bo(深水埗)買電話，我話你都好勁喎，唔係香港人又咁熟香港架步，佢仲識北上消費喎，佢話lee幾日會上深圳玩，仲會去埋蛇口同澳門，o個度有outlet買野平d，橫睇掂睇都唔似鬼佬囉!

*******************************************************************

劉德華(係我心目中既劉華)叫我幫佢表弟譯份履歷表，睇到我一額汗。佢表弟好勁，係鋼琴家，嬴過好多國際大奬，仲彈過Rachmaninov Piano concerto No.2喎(可以話係鋼琴曲目中最難彈既)，份履歷表水蛇春咁長，仲要嬴過咩咩奬物物奬，又跟過邊個師傅，唔難譯既，但o個d比賽名、奬項名勁難搵，不過我都算係咁，一晚就搞掂哂~不過譯完攰o個頭又瞓唔著囉，華仔今次好請食飯呀! 星期六佢要開演唱會(即唱K)，我同Lydia一於去做表演嘉賓，順便去佢豪宅搵朱麗倩食埋晚飯~~~

*********************************************************************************

唔知點解又好想搬...可能搬屋係會搬上癮...覺得Auburn真係唔係幾方便，夜d返屋企都唔得，犠牲左幾多夜生活。好想搬去Meadowbank或Rhodes，Canada Bay，Abbotsford都好....如果有車既話其實搬去邊都得。Yaris幾cute呀，平平地細細架岩哂我，但我又好鍾意Nissan賣緊廣告o個部，個款幾型~米高話佢會幫我搵架平平地既日本車，under $6000都唔駛旨意有Yaris啦，睇怕佢都係會搵d八幾年起哂角o個d....唉...住Auburn，開舊車，咁既人生都幾揼.....灰.....